मंडळी एसबीआय कार्डने आपल्या रिवॉर्ड पॉईंट्स प्रोग्राममध्ये काही महत्त्वाचे बदल केले आहेत, जे १ एप्रिल २०२५ पासून लागू होतील. या बदलांमुळे ऑनलाइन व्यवहार आणि प्रवासाशी संबंधित खरेदीसाठी मिळणाऱ्या रिवॉर्ड पॉईंट्समध्ये कपात करण्यात आली आहे. हे बदल एसबीआय कार्ड, एअर इंडिया एसबीआय प्लॅटिनम क्रेडिट कार्ड आणि एअर इंडिया एसबीआय सिग्नेचर क्रेडिट कार्ड धारकांसाठी लागू असतील. त्यामुळे कार्डधारकांनी या बदलांची माहिती घेऊन त्यानुसार आपली व्यवहार योजना आखणे आवश्यक आहे.
स्विगी व्यवहारांवर कमी रिवॉर्ड पॉईंट्स
१ एप्रिल २०२५ पासून सिम्पली क्लिक एसबीआय कार्डद्वारे स्विगीवर केलेल्या व्यवहारांवर मिळणाऱ्या रिवॉर्ड पॉईंट्समध्ये कपात केली जाईल. यापूर्वी स्विगीवरील खरेदीसाठी १०X रिवॉर्ड पॉईंट्स मिळत होते, परंतु आता ते ५X करण्यात आले आहेत. हेच कार्ड अपोलो २४x७, बुक माय शो, क्लिअरट्रिप, डोमिनोज, आयजीपी, मिंत्रा, नेटमेड्स आणि यात्रा या ऑनलाइन शॉपिंग प्लॅटफॉर्मवर १०X रिवॉर्ड पॉईंट्स देत राहील.
एअर इंडिया तिकिटांवरील रिवॉर्ड पॉईंट्समध्ये बदल
३१ मार्च २०२५ पासून एअर इंडिया वेबसाइट किंवा मोबाईल एपद्वारे तिकीट खरेदी केल्यास एअर इंडिया एसबीआय प्लॅटिनम क्रेडिट कार्ड आणि एअर इंडिया एसबीआय सिग्नेचर क्रेडिट कार्डवर पूर्वीपेक्षा कमी रिवॉर्ड पॉईंट्स मिळतील. तसेच, एसबीआय प्लॅटिनम क्रेडिट कार्डवरील इतर काही रिवॉर्ड पॉईंट्स योजनांमध्येही बदल करण्यात आले आहेत.
कॉम्प्लिमेंट्री इन्शुरन्स बंद
एसबीआय कार्डने आपला कॉम्प्लिमेंट्री इन्शुरन्स बंद करण्याचा निर्णय घेतला आहे. २६ जुलै २०२५ पासून कार्डधारकांना ५० लाखांचा अपघाती विमा कव्हर आणि १० लाखांचा रेल्वे अपघाती विमा कव्हर देणे थांबवण्यात येणार आहे.
कार्डधारकांसाठी महत्त्वाची सूचना
वरील बदल लक्षात घेऊन कार्डधारकांनी आपल्या खर्चाचे व्यवस्थापन करणे आवश्यक आहे. नवीन नियमांनुसार व्यवहार करण्याआधी रिवॉर्ड पॉईंट्सच्या अटी तपासून योग्य तो निर्णय घ्यावा. अधिक माहितीसाठी अधिकृत एसबीआय कार्ड वेबसाइटला भेट द्या.
