मंडळी स्टेट बँक ऑफ इंडिया (SBI), जी भारतातील सर्वात मोठी सार्वजनिक क्षेत्रातील बँक आहे, तिने आपल्या एटीएम सेवा वापरणाऱ्या ग्राहकांसाठी नियमांमध्ये काही महत्त्वाचे बदल जाहीर केले आहेत. यामध्ये मोफत एटीएम व्यवहारांच्या मासिक मर्यादेत तसेच त्या मर्यादेनंतर लागणाऱ्या शुल्कांमध्ये सुधारणा करण्यात आली आहे.
नवीन नियमांनुसार, SBI चे ग्राहक दरमहा SBI च्या एटीएमवर १० मोफत व्यवहार करू शकतील. याशिवाय, इतर बँकांच्या एटीएमवर दरमहा ५ मोफत व्यवहार करण्याची सुविधा उपलब्ध असेल. ही सुविधा मेट्रो शहरातील आणि इतर शहरांतील सर्व ग्राहकांसाठी सारखीच राहील. मात्र ज्या खातेदारांच्या खात्यातील सरासरी मासिक शिल्लक एक लाख रुपये किंवा त्याहून अधिक आहे, त्यांना SBI आणि इतर बँकांच्या एटीएमवर कोणतीही मर्यादा न ठेवता अमर्यादित मोफत व्यवहार करता येणार आहेत.
ज्यांच्या खात्यातील सरासरी मासिक शिल्लक २५,००० रुपये ते एक लाख रुपयांदरम्यान आहे, अशा ग्राहकांनाही इतर बँकांच्या एटीएमवर दरमहा ५ मोफत व्यवहारांची सुविधा दिली जाईल.
जर ही मोफत मर्यादा ओलांडली गेली, तर SBI च्या एटीएममधून पैसे काढण्यासाठी १५ रुपये आणि GST शुल्क आकारले जाईल. इतर बँकांच्या एटीएमवर पैसे काढल्यास हे शुल्क २१ रुपये आणि GST इतके असेल. शिल्लक चौकशी किंवा मिनी स्टेटमेंटसारख्या गैर-आर्थिक व्यवहारांसाठी SBI च्या एटीएमवर कोणतेही शुल्क आकारले जाणार नाही, परंतु हेच व्यवहार इतर बँकांच्या एटीएमवर केल्यास १० रुपये आणि GST शुल्क लागेल.
जर खात्यात पुरेशी रक्कम नसल्यामुळे व्यवहार अयशस्वी झाला, तर ग्राहकाकडून २० रुपये आणि GST शुल्क आकारले जाईल.
या सर्व बदलांव्यतिरिक्त, बँकेने आणखी एक नवा नियम लागू करण्याची घोषणा केली आहे. एक मे २०२५ पासून, मासिक मोफत मर्यादा ओलांडल्यानंतर प्रत्येक रोख रकमेच्या व्यवहारासाठी ग्राहकांना २३ रुपये शुल्क भरावे लागणार आहे. त्यामुळे ग्राहकांनी या नवीन नियमांची नोंद घेऊन त्यानुसार आपले व्यवहार नियोजित करावेत.
