मंडळी म्युच्युअल फंड सही है ही जाहिरात तुम्ही नक्कीच पाहिली असेल. सध्या बरेच लोक गुंतवणुकीचं महत्त्व ओळखून बाजाराकडे वळताना दिसतात. गुंतवणुकीचे अनेक पर्याय उपलब्ध असले तरी जोखीम आणि परतावा यांचा विचार करून योग्य पर्याय निवडणं महत्त्वाचं ठरतं.
म्युच्युअल फंड हे अनेकांसाठी आकर्षक पर्याय ठरले आहेत. विशेषता सिस्टिमॅटिक इन्व्हेस्टमेंट प्लॅन (SIP) हा नियमित गुंतवणुकीचा मार्ग लोकप्रिय झाला आहे. जोखीम कमी असावी आणि दीर्घकालीन उद्दिष्ट साध्य करायचं असल्यास SIP हा चांगला पर्याय ठरतो. SIP कॅल्क्युलेटरच्या मदतीने तुम्ही तुमच्या गुंतवणुकीचा अंदाज बांधू शकता.
SIP म्हणजे सिस्टिमॅटिक इन्व्हेस्टमेंट प्लॅन. यामध्ये तुम्ही दरमहा किंवा ठराविक कालावधीत म्युच्युअल फंडात ठराविक रक्कम गुंतवू शकता. यामुळे बाजारातील चढ-उतारांचा परिणाम तुमच्यावर कमी होतो आणि तुम्ही संयमाने मोठ्या रकमेचा निधी उभारू शकता.
समजा तुमचं उद्दिष्ट पुढील १५ वर्षांत २ कोटी रुपये उभारण्याचं आहे. यासाठी SIP कॅल्क्युलेटरचा वापर करून अंदाज घेता येतो. जर तुम्ही महिन्याला ४०,००० रुपये गुंतवत असाल आणि त्यावर १२ टक्के वार्षिक परतावा मिळाला, तर १५ वर्षांच्या कालावधीत तुम्हाला सुमारे २ कोटी १ लाख रुपये मिळू शकतात. यामध्ये तुमची एकूण गुंतवणूक ७२ लाख रुपये असेल आणि नफा सुमारे १.२९ कोटी रुपये होईल.
एसआयपीचा मुख्य फायदा म्हणजे चक्रवाढ व्याज. जितकी लवकर गुंतवणूक सुरू कराल, तितका जास्त परतावा मिळण्याची शक्यता असते. याशिवाय नियमित गुंतवणुकीमुळे बाजारातील जोखीमही तुलनेने कमी होते. दरमहा ठराविक रक्कम गुंतवल्यामुळे खर्चावरही नियंत्रण राहतं.
तज्ज्ञांच्या मते, लवकर गुंतवणूक सुरू करणे हे आर्थिक यशाचं प्रमुख सूत्र आहे. उदाहरणार्थ जर तुम्ही २५ व्या वर्षी महिन्याला ४०,००० रुपये SIP सुरू केली, तर ४० व्या वर्षी तुमच्याकडे अंदाजे २ कोटी रुपये असतील.
सिस्टिमॅटिक इन्व्हेस्टमेंट प्लॅनसारखा पर्याय तुमच्या आर्थिक भविष्याची मजबूत पायाभरणी करू शकतो. योग्य नियोजन, संयम, आणि लवकर सुरू केलेली गुंतवणूक यामुळे तुमचं २ कोटींचं स्वप्न सहज साकार होऊ शकतं. SIP कॅल्क्युलेटर वापरून तुमचं वैयक्तिक उद्दिष्ट ठरवा आणि आर्थिक स्थैर्याकडे वाटचाल करा.
म्युच्युअल फंड गुंतवणूक ही बाजारातील जोखमीच्या अधीन असते. संभाव्य परतावा हा केवळ अंदाज असतो. बाजाराच्या स्थितीनुसार प्रत्यक्ष परतावा वेगळा असू शकतो. त्यामुळे कोणतीही गुंतवणूक करण्यापूर्वी आर्थिक सल्लागारांचा सल्ला घेणं आवश्यक आहे.
